Филиппиний нийслэл Манила хотноо зохион байгуулж буй "Miss Earth-2024" тэмцээнд Монгол Улсаас үндэсний ялагч П.Цэлмэг оролцож байна.

Тэрбээр олон нийтийн цахим санал асуулгаар тавдугаарт жагсаж байгаа талаар тэмцээний албан ёсны хуудаст мэдээлжээ. Тодруулбал, шилдэг аравт Монгол болон Фижи Улс орж ирснийг онцолжээ. Дэлхийн 80 гаруй орны гоо бүсгүйчүүд өрсөлдөж буй тус тэмцээний ялагч хоёр хоногийн дараа тодорно. Олон нийтийн санал асуулгыг тэргүүлсэн оролцогч финалын шатанд шууд шалгарах юм.

П.Цэлмэг шүдний эмч мэргэжилтэй бөгөөд АШУҮИС-д нүүр, ам судлал чиглэлээр магистрт суралцдаг, “Андра академи"-ийн бүжгийн багш, англи хэлтэй аяллын хөтөч тайлбарлагч юм. Тэрбээр сагсан бөмбөгийн нэгдүгээр зэрэгтэй. Мөн “Авьяаслаг монголчууд” шоу нэвтрүүлгийн шилдэг 32 оролцогчийн нэг “Hobby dance” бүжгийн хамтлагийн ахлагч аж.

Монголчууд өөрийн  миссээ дэмжиж, санал өгөхийг хүсвэл missearth2024.1voting.com цахим хаягаар хандах боломжтой юм байна.