Баянгол, Хан-Уул, СХД-ийн Эрүүгийн хэргийн анхан шатны тойргийн шүүхэд Булган аймгийн ИТХ-ын төлөөлөгч асан С.Гал-Эрдэнэ, Нийтийн хэв журам хамгаалах тасгийн хэсгийн байцаагч О.Жамъянсүрэн нарт холбогдох шүүх хурал өчигдөр болсон. Булган аймгийн ИТХ-ын төлөөлөгчөөр сонгогдон ажиллаж байсан, “Хангай констракшн” захирал С.Гал-Эрдэнэ нь цагдаагийн алба хаагчид хахууль өгсөн нь мөрдлөгийн явцад тогтоогдсон байна. 

Мөрдөн шалгалтын явцад 2023 оны долдугаар сард мөрдөгч О.Жамъянсүрэнгийн охины данс руу С.Гал-Эрдэнээс хоёр удаа тус бүр нэг сая төгрөг шилжүүлсэн болох нь тогтоогдсон төдийгүй О.Жамъянсүрэн гэм буруугаа хүлээн зөвшөөрчээ.  Ингээд  Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүх хуралдаж С.Гал-Эрдэнийг хахууль өгсөн, О.Жамъянсүрэнг хахууль авсан гэм буруутай гэж үзэн, нийтийн албанд томилогдох эрхийг эрхийг тус бүр 4 жилээр хасаж, нээлттэй хорих байгууллагад хоёр жил хорих ялаар тус тус шийтгэж, хахуулийн 2 сая төгрөгийг улсын орлого болгох шийдвэр гарсан байна.С.Гал-Эрдэнэ нь 2023 оны зургадугаар сард гэр бүлийн хүчирхийлэл үйлдэж, эхнэр Сэлэнгийнхээ биед халдсан гэж Хан-Уул дүүргийн цагдаагийн хоёрдугаар хэлтэст зөрчлийн хэрэг нээн шалгаж эхэлсэн байдаг. Хэргийг анх авч шалгасан мөрдөгч цэргийн тэтгэвэрт гарсан тул журмын дагуу С.Гал-Эрдэнийн зөрчлийн хэргийг тус хэлтсийн Нийтийн хэв журам хамгаалах тасгийн хэсгийн байцаагч О.Жамъянсүрэн хариуцан шалгажээ. Тэдний хувьд найз нөхдийн харилцаатай учир О.Жамъянсүрэн албан тушаалын байдлаа урвуулан ашиглаж С.Гал-Эрдэнэд давуу байдал олгож, зөрчлийн хэргийг шийдвэрлэхгүй удаашруулсан байна. Тиймээс эхнэр Сэлэнгэ нь дээрх хэрэгтэй холбоотойгоор С.Гал-Эрдэнэ өөрийн Хаан банкны данснаас мөрдөгч О.Жамъянсүрэнд мөнгө шилжүүлснийг АТГ-т мэдэгдсэнээр АТГ-аас хэргийг мөрдөн шалгажээ.