Хөгжлийн банкны өмчлөлд шилжүүлсэн үл хөдлөх хөрөнгийг нээлттэй худалдан борлуулах үйл ажиллагааны хүрээнд 18 үл хөдлөх хөрөнгийг худалдан авах саналыг www.dbm.mn цахим хуудсаар өнөөдөр 10:00 цагаас авч эхэлнэ.

Худалдан авах хүсэлт гаргагч нь банкны албан ёсны цахим хуудас дахь худалдан борлуулах үл хөдлөх хөрөнгө цэс рүү орж өөрийн сонирхож буй үл хөдлөх хөрөнгийн мэдээлэл дэх санал өгөх талбарыг сонгон санал илгээх товчийг дарж иргэн, хуулийн этгээдийн ерөнхий мэдээллийг бөглөж оруулах юм. Тухайн мэдээллийг дутуу бөглөсөн тохиолдолд санал илгээх боломжгүй бөгөөд иргэний үнэмлэх, хуулийн этгээдийн улсын бүртгэлийн гэрчилгээний хуулбар, санхүүгийн чадвараа нотолсон баримт, дансны хуулга зэрэг бусад мэдээллийг upload хийж оруулан илгээх товчийг дарах юм.

Худалдан авах хүсэлт гаргагчийн ирүүлсэн саналыг зургаадугаар сарын 20-ны 14:00 цагт цахим хуудсанд нэгтгэн шаардлага хангасан худалдан авагчтай холбогдож, гэрээ байгуулах ажлыг зохион байгуулна.

Хүсэлт гаргагчийн санхүүгийн чадавхыг нотолсон баримтад тулгуурлан дараах байдлаар үнэлнэ.

Үүнд:

• Бэлэн төлөлт (Дансны хуулга, бусад нотлох баримт)
• Банкны зээлийн шийдвэр (банкны тодорхойлолт, зээлийн гэрээ)
• Хэсэгчилж төлөх санал гаргах (Дуусаагүй барилгын хувьд зөвхөн гаргах бөгөөд бизнесийн үйл ажиллагаа, эргэн төлөлтийг нотолсон баримт)

Дээрх дарааллын дагуу хүсэлт гаргагчийн саналыг үнэлэх бөгөөд цахим системээр хамгийн түрүүнд ирсэн саналыг шалгаруулж, худалдан авах саналыг баталгаажуулна. Мөн хүсэлт гаргагч нь хэд хэдэн үл хөдлөх эд хөрөнгөд саналаа өгөх боломжтой.