Израилын арми Газа хотыг бүслэн Хамас бүлэглэлийн штабууд болон бусад дэд бүтцэд цохилт өгч байгаа тухай мэдэгдлээ. Энэ хот нь Газын зурвас дахь хамгийн том хот бөгөөд дайн эхлэхээс өмнө Палестины хүн амын дийлэнх нь тус хотод оршин сууж байв.

Газад хоргодох байр болгон ашиглаж байсан дөрвөн сургууль агаарын дайралтад өртөн сүйрсэний зэрэгцээ дүрвэгсдийн хуаран дахь сургуульд дор хаяж 20 хүн амиа алдсан гэж НҮБ-ын Палестины дүрвэгсдийн асуудал эрхэлсэн агентлаг мэдээлэв.

Лхагва гарагт нээгдсэн Египетийн хилийн ойролцоох Рафах боомтоор цөөн тооны иргэд Газаас гарах боломжтой болсон. Пүрэв гарагт шархадсан 21 палестин иргэн, 344 гадаад паспорт эзэмшигч, түүний дотор 72 хүүхэд хилээр нэвтэрсэн гэж Египетийн албаны хүмүүс мэдэгдэж буй.

Израилын арми Хамас бүлэглэлийн хяналтад байдаг Газын зурваст олон хоног агаараас цохилт өгч, өнгөрсөн долоо хоногт явган цэргийн давшилт эхэлсэн. 10 дугаар сарын 7-ноос хойш Газын зурваст хийсэн дайралтад 9061 палестин хүн амь үрэгдээд байна. Харин Израильд 1400 гаруй хүн амиа алджээ.