Их аварга Хакүхогийн удирддаг Миягино дэвжээг хаах саналыг гаргасан. Миягино дэвжээг энэ сарын башёд түр удирдаж буй Тамагаки оякатагийн хэлснээр дэвжээг нь хааж бөхчүүдийг өөр багшид шилжүүлэх шийдвэрийг сонссон даруйдаа тус дэвжээний зарим бөхчүүд зодог тайлах хүсэлтэй байгаагаа илэрхийлсэн аж.

Хакүхогийн шавь нарыг Ошима дэвжээ рүү шилжүүлэхээр төлөвлөж буйг Тамагаки мэдэгдсэн. Тэгвэл Кёкүтэнхо Н.Цэвэгнямын удирддаг тус дэвжээ шинэ бөхчүүдийг хүлээн авахад татгалзах зүйлгүй гэдгээ мэдэгджээ. Миягино дэвжээг хаах шийдвэр гарсантай холбогдуулан change.org сайт дээр энэ шийдвэрийг эсэргүүцсэн япон иргэд гарын үсэг цуглуулж эхэлжээ. Шавийнх нь үйлдсэн хэрэг багшид нь хамааралгүй, дэвжээг хаах шалтгаан биш гэж уг саналыг авч буй иргэн үзжээ. Одоогоор 6,262 хүн санал өгсөн байна.