Нийслэлийн Засаг дарга бөгөөд Улаанбаатар хотын захирагч Х.Нямбаатар Засгийн газрын хуралдаанаас гаргасан шийдвэрийг танилцуулав. Тэрбээр "Улаанбаатар хотын агаарын бохирдлыг бууруулах тухай тогтоолыг албажуулан баталлаа. Өнөөдрийн байдлаар 200 орчим мянган айл өрх хатуу түлш хэрэглэж байгаа. Үүнээс гадна 2500 орчим нам даралтын зуух, 170 орчим дунд оврын уурын зуух агаарын бохирдлыг үүсгэж байгаа. Мөн өдөрт 500-600 мянган авто машин хөдөлгөөнд оролцож байгаа. Түүчлэн хоёр, гурав, дөрөвдүгээр цахилгаан станц, Амгалангийн дулааны станц агаар бохирдуулж байгаа. Эдгээрээс агаарын бохирдлын хамгийн том эх үүсвэр нь 200 орчим мянган айл өрх. Тиймээс 2025-2026 оны өвлийн бэлтгэл болгож 32-50 мянган айл өрхийг хийн түлшэнд шилжүүлэх шийдвэр гаргалаа.

Хатуу түлшний хэрэглээнээс сайн дураараа татгалзаж, дулаан алдалтаа бууруулж стандартын шаардлага хангасан айлуудад нийслэлээс хийн түлшний зуух байрлуулж, аюулгүй ажиллагааны зааварчилгаа өгнө. Мөн есдүгээр сарын 15-наас тавдугаар сарын 15 хүртэл сар бүр 100 мянган төгрөгийн татаас олгоно.

Бүх яам агаарын бохирдлыг бууруулах үүрэг хүлээсэн байдаг. Тиймээс гэр хорооллуудыг бүсчлэн яамдад хариуцуулж айл өрхүүдийн дулаан алдагдлыг бууруулах чиглэлээр ажиллуулахаар тогтоолд заасан. Мөн айрл өрхүүдийн дулаан алдагдлыг бууруулж, стандартад нийцүүлэх ажилд төрийн цэргийн байгууллагуудыг оролцуулна. Бас төрийн өмчит компаниуд энэ ажилд дэмжлэг үзүүлнэ.

Монгол Улсын хийн түлшний жилийн хэрэглээ 46 мянган тонн байгаа. 32-50 мянган айлыг хийн түлшинд шилжүүлснээр 100 мянган тонн болж өснө. Тиймээс хийн түлш импортлогч аж ахуйн нэгжүүдтэй хамтран ажиллахаар гэрээнийхээ төсөл дээр ажиллаж байна" гэв.