Узбекистаны Ташкент хотод өнөөдөр эхэлсэн жүдо бөхийн Их Дуулга тэмцээний эмэгтэйчүүдийн 52 кг-д барилдсан Л.Сосорбарам хүрэл медаль хүртлээ. Түүний жинд 31 орны жүдочид зодоглосноос Л.Сосорбарам эхний тойрогт хийлээд хоёрын даваанд Германы жүдоч Маша Боллхаусыг, гуравдугаар тойрогт Мексикийн Паулина Мартинесийг, хэсгийн аваргын төлөө Киприйн София Асвестаг ялсан.

Харамсалтай нь медалийн төлөө Узбекистаны Жураева Гулхад дийлдэв. Ингээд хүрлийн төлөө Японы Кокоро Фүжиширог ялснаар IJF-ийн цуврал тэмцээнээс зургаа дахь медалиа авлаа. Тэрбээр өмнө нь гурван мөнгө, хоёр хүрэл медальтай байсан юм.