Конгрессын доод танхим АНУ-ын зах зээлд ТiкТок үйлчилгээг хориглох тухай хуулийн төслийг дэмжлээ. Ингэснээр TikTok-ыг эзэмшигч Хятадын ByteDance компанид хяналтын багцаа зарах зургаан сарын хугацаа өгч буй аж. Энэ хугацаанд эзэмшигч өөрчлөгдөхгүй бол уг программыг АНУ-д ашиглахыг бүрэн хориглох юм.

Хуулийн төслийг Сенатын танхимаар хэлэлцэж дэмжсэн тохиолдолд Ерөнхийлөгч Жо Байден гарын үсэг зурж баталгаажуулснаар хүчин төгөлдөр үйлчилнэ. АНУ-ын хууль тогтоогчид Tik Tok үйлчилгээн дэх Хятадын нөлөөний талаар удаан хугацааны турш санаа зовниж ирсэн. Өөрөөр хэлбэл Америкийн зах зээлд 150 сая хэрэглэгчтэй тус үйлчилгээ хувь хүмүүсийн мэдээллийг Хятадын тусгай албадад дамжуулах боломжтой гэж үзэж буй. Хуулийн төслийн санал хураалт явагдах үеэр Конгрессын ордны гадна  TikTok-ын хэрэглэгчид эсэргүүцлийн цуглаан зохион байгуулжээ.

2012 онд байгуулагдсан Бээжинд төвтэй ByteDance компани хэдийгээр Кайманы арлуудад бүртгэлтэй ч Европ болон АНУ даяар салбартай.