Ерөнхий сайд Л.Оюун-Эрдэнийн зөвлөхөөр Э.Эрдэнэжамъяаныг томиллоо. Түүний хувьд "Монгол Ардын нам хариуцсан зөвлөх" гэсэн албан тушаал авчээ. Л.Оюун-Эрдэнэ Ерөнхий сайдын зэрэгцээ МАН-ын дарга хэдий ч энэ тусдаа институци. Гэвч МАН хариуцсан зөвлөхийн орон тоог Ерөнхий сайд дэргэдээ үүсгэсэн нь анхаарал татаж, АН, ХҮН намыг ч хариуцсан зөвлөх томилох уу гэдэг асуулт бий болголоо.

Э.Эрдэнэжамъян бол Ерөнхийлөгч асан Н.Энхбаярын хүн. МАХН гэж байхад ерөнхий нарийн бичгийн даргаар нь ажиллаж байв. Э.Эрдэнэжамъян Н.Энхбаярын бүхий л улс төрийн үйл хэрэгт дагалдаж ирсэн ч Боомтын сайд Б.Тулга, хүү Э.Батшугар нартай нь эн зэрэгцэж чадаагүй. Гэхдээ хожим хойно ч Н.Энхбаяр түүнийг албан тушаалтай болгож чадлаа.