“Бишрэлт Метал” болон “Эс Жи Эйпс” багуудын цувралын гурав дахь тоглолт боллоо. Тоглолт 87:84 онооны харьцаагаар “Эс Жи Эйпс” багийн хожлоор өндөрлөсөн. Ингэснээр цувралыг 3:0 үзүүлэлттэй “Эс Жи Эйпс” баг тэргүүлж эхлэв. Дараагийн тоглолтод “Бишрэлт Метал” баг хожигдох эрхгүй болж байна. Тэд энэ цувралыг тэргүүлэхийн тулд дөрөв дараалсан хожих хүндхэн даалгавартай үлдэв. “Эс Жи Эйпс” багийн хувьд одоо ганцхан хожил үлдлээ.

Хагас шигшээд үлдсэн багуудаас “Хасын Хүлэгүүд” болон “Сэлэнгэ Бодонс” багуудын тоглолт хамгийн сонирхолтой үргэлжилж байна. Цувралын турш анхаарал татаж байгаа хоёр багийн гол онцлох тоглогч бол өмнө нь NBA-ийн бүх оддын тоглолтод сонгогдож байсан Олимп, Дэлхийн аварга ДеМаркус Казинс юм. “Сэлэнгэ Бодонс” багт хүчин зүтгэж буй түүний хувьд одоо хожигдох эрхгүй байгаа. Учир нь цувралыг “Хасын Хүлэгүүд” 3:2 онооны харьцаагаар тэргүүлээд эхэлсэн. Тиймээс “Сэлэнгэ Бодонс” багийн хувьд долоо дахь тоглолтыг гаргахын тулд  маргаашийн тоглолтод заавал хожих учиртай. Тиймээс энэ улирлын хамгийн үнэ цэнэтэй тоглолтын нэгээр “Хасын Хүлэгүүд” болон “Сэлэнгэ Бодонс” багуудын тоглолт болж байна. Маргааш “Хасын Хүлэгүүд” цааш тоглох хожлыг авах эсвэл “Сэлэнгэ Бодонс” баг долоо дахь цувралыг гаргах уу гээд тун хариуцлагатай тоглолт үлдлээ. 

Монголын сагсан бөмбөгийн холбооны 2024-2025 оны Үндэсний Дээд лигийн маргааш буюу дөрөвдүгээр сарын 3-нд болох “Хасын Хүлэгүүд” болон “Сэлэнгэ Бодонс” багуудын тоглолт 19:10 цагаас эхэлнэ.