Канадын Калгарийн Их сургуулийн дэд профессор Дарла Зеленицки судалгааны багийн хамтаар Монгол орны говиос онцлог хоёр хуруутай сарвуу бүхий үлэг гүрвэлийн олдворыг илрүүлсэн байна. Палеонтологичид уг чулуужсан олдворыг урьд өмнө нь үзэгдэж байгаагүй үлэг гүрвэлийн шинэ төрөл хэмээн үзэж байгаа бөгөөд онцгой олдворуудын нэг болоод буй.

Тус олдворын нэг сарвууны хумсны бүрхүүл бүтэн хадгалагдан үлджээ. Судлаачдын үзэж байгаагаар энэ төрлийн бүрэн хадгалагдан үлдсэн хамгийн том сарвуу гэнэ.

Шинээр илэрсэн үлэг гүрвэлийн шинжлэх ухааны нэр нь Duonychus tsogtbaatari бөгөөд Монголын нэрт палеонтологич Х.Цогтбаатарын нэрэмжит болжээ. Duonychus нь грек хэлнээс орчуулбал "хоёр сарвуу" гэсэн утгатай юм.

Duonychus tsogtbaatari нь этгээд дүр төрхтэй теризинозавр овгийнх бөгөөд энэхүү бүлэг нь махан идэшт Тираннозавр Рекстэй адил теропод бүлэгт хамаардаг байна.

Шинээр олдсон энэ үлэг гүрвэл нь 3 метр өндөр, 260 кг жинтэй байсан бөгөөд муруй сарвуунуудаа ашиглан ургамалд хүрч, 10 см хүртэл голчтой мөчир атгаж чаддаг байсан гэж судалгаанд дурджээ.

Тус үлэг гүрвэлийн сүүл, нуруу, ташаа, гар, хөлийн чулуужсан хэсэг зэргийг Монгол Улсын Шинжлэх Ухааны Академийн харьяа Палеонтологийн хүрээлэнгийн судлаачид илрүүлсэн байжээ. 

Зеленицкигийн хэлснээр, хоёр хуруутай сарвууг зөвхөн мөчир атгахаас гадна өөрийгөө хамгаалах зэвсэг болгон ашиглаж байсан байж магадгүй байна.