ЗГХЭГ-ын дарга Н.Учрал Засгийн газрын хуралдаанаар хэлэлцсэн асуудлуудын талаар мэдээлэл хийлээ. Тэрээр "Аж үйлдвэр, эрдэс баялгийн яамнаас стратегийн 16 ордын хил хязгаарыг тогтоох асуудлаар танилцуулга хийлээ. Мөн стратегийн ордын жагсаалтад оруулах 39 ордын асуудлын УИХ-д өргөн мэдүүлэхээр төлөвлөж байна.

Ирэх долоо хоногт тогтоолын төслийг бэлтгэж Засгийн газрын хуралдаанаар хэлэлцүүлнэ. Уг тогтоолын төслийг УИХ-аар хэлэлцүүлэн батлуулснаар стратегийн орд 55 болж нэмэгдэнэ. Тавантолгойн орд бол эдгээр ордын зөвхөн нэг л орд нь юм. Хэрэв иргэд энэ бүх ордоос ашиг хүртдэг болбол ямар хэмжээний ашиг хүртдэг болох нь ойлгомжтой. "Эрдэнэс Тавантолгой" компани 2024 онд 3.9 их наяд төгрөгийн борлуулалт хийсэн. Үүний үр дүнд ногдол ашиг тарааж эхэлсэн. Үлдэгдэл 93500 төгрөг тараахаар төлөвлөж байгааг тус компаниас мэдээлсэн.

Стратегийн ордын жагсаалтад оруулах боломжтой 39 ордод миний хэлсэн Төгрөг нуурын орд хамаардаг. 1983 оноос хойш хайгуул хийж нөөцийг нь тогтоосон. 3.1 тэрбум тонны нөөцтэй нь тогтоогдсон. Энэхүү ордын дөрвөн лицензийг "Төгрөг-Энержи" компани эзэмшдэг. УИХ-ын гишүүн, Ерөнхийлөгч асан Х.Баттулга Төгрөг нуурын ордыг зарсан нь үнэн. Зарах зарахдаа Виржини арал, Сингапур, Хонконгод бүртгэлтэй компаниудаар дамжуулан 250 сая ам.доллароор зарсан. Баялгийн сангийн хуулийн ажлын хэсгийн ахлагчийн хувьд УИХ-ын гишүүн Х.Баттулгад хандан энэ олон компаниудтайгаа өөрөө учраа олж, хутгасан асуудлаа нэг талд нь гаргаж шийдвэрлэх долоо хоногийн хугацаа өгч байна. Шийдэж чадахгүй бол Засгийн газар хуулийн хүрээнд дараагийн арга хэмжээгээ авна"

гэлээ.